- Oleh Tgk Samuti Sp. Mesra
KABARDAILY.COM | CAE
Assalamualaikum wahe e rakan
Saleum lontuan keu kaom tani
Peutani inong atawa agam
Nibak lontuan saleum ulon bri
Na bacut haba dalam karangan
Lon neuk sampaikan wahe e akhi
Baro-baro nyoe dalam siaran
Kateuka Mentan nanggroe seurambi
Lheuh tron pesawat di bapak Mentan
Deungon rombongan langsong geuili
Wate geulewat gobnyan bak jalan
Geukalon lam blang na ureung tani
Na ureung Inong dalam blang sinan
Wahe e rakan teungoh koh padi
Geu yue dong moto laju wate nyan
Geumeuhoi rijang nyan ibu tani
Geuyue ek mota laju le rijang
Pakat jak sajan rombongan Mentri
Di ibu tani teukeujet h’an ban
Nibak wate nyan sang aleh pakri
Gohlom geutupeu yang pakat gobnyan
Dalam rombongan na sidroe Mentri
Bandum geuyue jak ikot rombongan
Ngon pakaian jak u blang h’an peu padoli
‘Oh trok bak teumpat na pertemuan
Di bapak Mentan geuhoi buk tani
U ateuh pentas geuyue ek rijang
Meureumpok ngon gobnyan wahe e akhi
Lheuh geuteumanyong na padum macam
Keu ibu tani nyan hadiah geubri
Moto koh pade pak Mentan sumbang
Keu klp tani nyan ureung Samuti
Le ibu tani teupike yoh nyan
Kadang geupeugah sagai lage yg ka terjadi
Wate lheuh geu jok geu tarek pulang
Lage na saboh jan di pulau Jawi(a)
Rupanya kali nyoe kon le lage nyan
Bapak Mentri pertanian na lage janji
Moto koh pade langsong hai rakan
Trok laju lheuh nyan u Gampong Samuti
Amanah keubit di bapak Mentan
Jareung yang meunan tanyoe temui
Teurimong gaseh Pak Andi Amran
Rahmat Tuhan keudroe neuh geubri
Beujioh peunyaket beusehat badan
Droe neuh pak Mentan beuridha ilaihi
Bala beujioh bak kementrian
Sampoe akhe jabatan droe neuh keu Mentri
Aneuk tulo breuh di cong bak mancang
Cem pala subang di cong bak giri
Haba lon tuleh kadang h’an reumbang
Meu’ah lontuan wahe e akhi*
