- Oleh Tgk. Samuti Sp. Mesra
KABARDAILY.COM –
Assalamu’alaikum rakan boh haté
Saleuem sitangké bak lôn keu gata
Saleuem horeumat jinoe ulôn bré
Ulôn peusaré h’an lôn peudèda
Beurangpat mantöng meudomisilé
Gampông ngön di glé ulôn peurata
Tuha ngön muda pih lôn peusaré
Gantoe ulôn bré kupi ngön bada
Na saboh haba lôn keuneuk rawé
Masalah mbg lôn neuk ceurita
Keu aneuk sikula ji bri mbg
Ji peugah bu pré lé penguasa
Padahai rakyat yang bayeue sabé
Pajak ji rugé bak tanyoe hana pré masa
Ban bacut teulat pajak tanyoe bré
Geutanyoe akhé laju ji deunda
Meunyo lagèe nyan neu cuba piké
Peu ji peugah pré wahé syedara
Rata jeut gampông dapu mbg
Anggaran ji gulé hana meudum na
Jeut sagoe dana keunan meugulé
Dumpat ji rugé ubé bé yang na
Bak anggaran pendidikan pih na ji rugé
Meunan cit hai akhé bak dana desa
Soai ji korupsi pih h’an peu piké
Rata dapu mbg ji meufoya-foya
Na yang laén lom modèl hai akhé
Dapu mbg na yang gohlom na
Dapu fiktif rata sagoe bé
Anggaran ka cayé dapu cit hana
Nyan keuh ban cara donya ka akhé
Cukôp that jahé yang mat kuasa
Geutanyoe rakyat h’an jeut marit lé
Beuthat boh haté seusak lam dada
Nyo na keracunan pih tan ji piké
Bak stasion teve dak jeut bèk na berita
Ban na keracunan meunoe ji kheun lé
Menu mangat mbg siswa goh terbiasa
Nyo meunan haba soe yang h’an seungké
Neucuba piké ngön bijaksana
Siswa caröng ji kheun berkat mbg
Stanting pih tan lé singöh lulusan sikula
Meunan keuh ji kheun ta deungö sabé
Lé si Wowawé wahé syèdara
Na cit lom ji kheun lé si Wowawé
Aneuk miet pandé kön bak sikula
Keupeu cit guru geu ngajar sabé
Nyo meunan si Wowawé peuteubiet haba
Asai meuka ji pr’ak seugoh ji piké
Cit meunan sabé ji peugah haba
Jai that laén lom h’an peu ta rawé
Rakan boh haté cit meuphôm raya
DPR Malang jinoe ka saboh haté
Tulak mbg awak nyan h’an ji teurima
Awak nyan kompak bandum ka saré
Patéh ji kheun kré lé mahasiswa
Daerah laén pih ka jeut ci piké
Bèk gadôh lalè lé ngön mangat haba
Nyo haba mangat cit h’an peu ta piké
Tiep uroe sabé lagèe nyan cara
Geutanyoe rakyat h’an jeut marit lé
Nyo that ta piké sakét lam dada
Udép lam nanggroe jinoe that seungké
Kota ngön di glé rakyat cukôp jra
Meumada ‘ohnoe haba lôn rawé
Meu’ah beuneubré nyo salah rika
Hana niet ulôn kheun keu mbg
Neucuba piké jinoe beusama-sama
Sp. Mesra, 1 September 2026.
