- Oleh Tgk. Samuti Sp. Mesra
KABARDAILY.COM | BUDAYA
Assalamu’alaikum wahé e waréh
Saleuem lôn tuléh cit keu syèdara
Saleuem horeumat keu bandum waréh
Hana lôn peucéh tuha ngön muda
Beurangpat mantöng sinoe ngön sidéh
Sambôt hai waréh saleuem seujahtra
Na bacut haba lôn keuneuk rintéh
Haba lôn tuléh bh’ah piala donya
Piala donya rakan jinoe ka abéh
Nyan keuh hai waréh lôn neuk ceurita
Rata jeut café sinoe ngön sidéh
Ureung meulapéh bak nonton bola
Di luwa nanggroe bola di sidéh
Tanyoe tan ta éh leubèh poh dua
Kadang trôk suboh bola goh abéh
Watèe pih abéh sembahyang hana
Kadang goh suboh bola ka abéh
Woe laju jak éh suboh rap teuka
Kon ta prèh suboh bèk dilèe ta éh
Lheuh shalat ta éh cukôp seuninya
Watèe ta ingat cukôp that seudéh
Rugoe hana éh tanyoe meujaga
Shalat tahajud dilèe beudöh bak ta éh
Lagèe nyan waréh cukôp mulia
Lheuh shalat tahajud hana lé ta éh
Barô hai waréh ta nonton piala donya
Piala akhirat ka lheuh ta sapéh
Bak Allah sidéh meusalah hana
Meunyo lagèe nyan sang cukôp aréh
H’an rugoe waréh tanyoe meujaga
Bèk bak nonton bola wateé peuabéh
Ta tém beudöh éh beuthat poh dua
Meunyo tahajud h’an ék beudöh éh
Padahai sinan hai waréh raya that fahla
Cuba peurasa nyo h’an neupatéh
Peubiasa beudöh éh ateuh poh dua
‘Oh lheuh tahajud jeut cit lom ta éh
Beudöh lom waréh ‘oh suboh teuka
Sunat fajar pih beuna ta sapéh
Nilai jih waréh seu isi donya
Donya ngön isinya keu tanyoe waréh
Nyo h’an neupatéh tanyong ulama
Cit hana salah meunyo kheun hadéh
Hana pat langgéh nabi meusabda
Keu piala donya lôn peuwoe rintéh
Jinoe ka abéh wahé syèdara
Yang cok juara pih ka lheuh ji tuléh
Spanyol sidéh yang juara sa
Lamine Yamal cit ka ta patéh
Dak ji trom gatéh mantöng ji saba
Jih hana beungèh bah sakét gatéh
Yang peunténg ‘oh abéh reumpök juara
Piala ji puwoe u nanggroe jih keudéh
Awak nyan aréh ngön bijaksana
Sehat that meu’en sampoe ‘an abéh
Awak nyan pih waréh dukung Palestina
Teuma Argentina yang h’an teungeut éh
Seubab jih waréh hana juara
Sampoe abéh bola ji tém cet gatéh
Nyan keuh dum paléh wahé syèdara
Pendukung yahudi cit meunan paléh
Di nanggroe jih sidéh pih demo lé massa
Abéh ji reulöh peu yang meulanggéh
Polisi meubaréh ji tren jak peubla
Aneuk leuk kutru di công bak manggéh
Di công keureuléh na ticem pala
Meumada ‘ohnoe haba lôn tuléh
Meu’ah hai waréh nyo salah haba*
Sp. Mesra, 22 Juli 2026.
