- Oleh Tgk Samuti Sp Mesra
KABARDAILY.COM | CAE
Assalamualaikum rakan meutuah
Saleum sipatah lon keu syedara
Bandum kawom Mak dan kawom ayah
Lon lake meu’ah sigo lon sapa
Na bacut haba ulon neuk kisah
Haba lon peugah bh’ah rumoh tangga
Bak saboh wate ulon meulangkah
U rumoh sahbah meu uroe raya
Lakoe ngon binoe cukop that ramah
Ceuria leupah ta kalon rupa
Leumah leumbot haba geupeugah
Hana meusiblah haba yang gasa
Hate teuh leupie nyo meunan ulah
Raseuki mudah udep bahagia
Keluarga meunan geukheun sakinah
Mawaddah wa Rahmah wahe syedara
Inong ngon lakoe h’an tom meubantah
H’an tom si nyak mah ji peucon muka
Wate woe lakoe Inong yang ramah
Ji sambot bagah ngon rumeh muka
Tapi na ladom laen lom ulah
‘Oh lakoe peugah sabe ji dawa
Hana ji pateh peu lakoe peugah
Ji seu ot bagah ngon su yang gasa
Peurumoh lage nyan murka bak Allah
Meunan geupeugah oleh ulama
Inong Luth mantong murka bak Allah
Peu Nabi peugah ji deungo hana
Peulom geutanyoe hai dara ceudah
Beuingat leupah lam rumoh tangga
Nasehat lakoe nyo gata salah
Meubek ta bantah wahe nyak dara
Meunyo buet salah lakoe h’an teugah
Murka bak Allah keu lakoe gata
Meunan cit lakoe nyo pubuet salah
Nyo Inong teugah bek ta meudawa
Saleng nasehat geuyue le Allah
Nyo saleng bantah sinan phon dawa
Bek ta anggap droe yang beutoi leupah
Gop ta peusalah hana yang beuna
Meunan cit lakoe jinoe lon peugah
Deungon si Nyak Mah bek meu’en gasa
Beuleumah leumbot haba ta peugah
Bek bacut salah ta peuhu mata
Karna peurumoh kadang hek leupah
Maguen seumeurah dum peu keureuja
Ji jaga aneuk yang mantong mirah
Nyo ta peu upah padum beulanja
Peu lom peurumoh ladom na tugaih
Wahe hai sahbah guru sikula
Atawa bak kanto dan laen dinaih
Wate woe tugaih kadang ka jula
Oleh kareuna nyan rakan meutuah
Peureule leupah keureuja sama
Lam rumoh tangga silap ngon salah
Saleng peumeu’ah mangat bek seubra
Toktok beuragoe di cong bak panah
Jeh aneuk siwah di cong bak jeumpa
Haba lon tuleh kadang cit salah
Lon lake meu’ah wahe syedara.
