- Oleh Tgk Samuti Sp. Mesra
KABARDAILY.COM | CAE
Assalamualaikom rakan ngon wareh
Saleum lon sapeh keu kawon lingka
Adak beurangpat neuduek ngon neu eh
Bacut lon tuleh na saboh haba
Haba nasehat lon keuneuk tuleh
Keu hai meumileh dalam pilkada
Wate pih ka toe wahe e cut Teh
Ingat beuabeh bek ji peuraba
Neuingat beugot seugoh neupileh
Nyo salah pileh tanyoe sengsara
Limong thon u keue tanyoe teupayeh
Wap salah pileh wahe syedara
Memang jai janji yoh goh teupileh
Meunoe ngon meudeh bak canek haba
Neutimang timang bek pateh abeh
Kadang hai wareh keu mangat haba
Keu haba mangat kayem uroe jeh
Ureung ta pileh janji ji langga
Meunyo meujanji laot ta gareh
Wate teupileh meusapeu hana
Peulom yang jok peng droe ji yue pileh
Nyan beuneupateh yang phon ji langga
Phon kon ka desya yohgoh ta pileh
Ek jeut ta pateh yang meunan rupa
Na yang sembako ji bagi abeh
‘Oh toe meumileh tiep rumoh jiba
Tapi wate jih ka lheuh teupileh
Meusaboh bileh h’an ji peutaba
Oleh karna nyan wahe e wareh
Beucukop areh ngon bijaksana
Neu kalon beugot yang toh ta pileh
Bek that neupateh angen syeuruga
Keu haba mangat ka lheuh uroe jeh
Kalon hai cut Teh pakri ta rasa
Aceh nyoe gasien ka ji cap abeh
H’an pat ta langgeh yue kalon data
Nibak awak nyan cit ka meutuleh
Aleh hai wareh pat ji cok data
Mulai kali nyoe soe yang teupileh
Janji yg ka neutuleh beuneukeureuja
Peumaju Aceh lage uroe jeh
Lage hai wareh bak saboh masa
Ji thei u luwa geutanyoe keudeh
Pemimpin areh ngon bijaksana
Di dalam paya bek jareng bileh
U laot abeh bek jareng kadra
Nasehat ulon bacut keu wareh
Meunyo seuliseh meu’ah beuraya
Hana niet ulon peurunoe wareh
Pemimpin areh geutanyoe damba
Bandum geutanyoe bek salah pileh
Wahe e wareh sama ta jaga.
