- Oleh Tgk Samuti Sp. Mesra
KABARDAILY.COM | CAE
Salam ‘alaikum kawom sinaroe
Saleum bak lon nyoe bandum syedara
Buleun puasa ka geubet jaroe
Wahe e adoe cit ka geu bungka
Ka uroe raya jinoe geutanyoe
Ta mumat jaroe deungon syedara
Meunyo baroe kon na bacut kasyo
Aduen ngon adoe kadang na dawa
Kadang na teupeh sideh ngon sinoe
Mari geutanyoe bandum ta lupa
Bek ta ingat le atra ka lampau
Jinoe rakan droe ta meu’ah desya
Silaturahmi ta sambong jinoe
Peu lom hai adoe bak uroe raya
Geutanyoe aduen teurimong adoe
Jijak bak tanyoe lam uroe raya
Ji lake meu’ah tanyoe jok jaroe
Peumeu’ah adoe bek le ta tunda
Cit meunan geuyue bak tanyoe le Po
Wahe rakan droe beutapeucaya
Meunyo meupake sabe aduen ngon adoe
Amalan tanyoe h’an geuterurima
Beuthat ibadah teuh cula caloe
Bandum buet tanyoe nyan sia-sia
Beuthat sembahyang sampoe itam dhoe
Seudeukah tanyoe meujuta-juta
Meubeok tan yum buet nyan nibak Po
Ngon sebab tanyoe putoh syedara
Oleh karna nyan wahe e adoe
Beudoh ju jinoe jak bak syedara
Ta jak bak aduen jak mumat jaroe
Bak uroe got nyoe bak uroe raya
Meunyoe cit aduen h’an jitueng adoe
H’an ji mumat jaroe cit deungon gata
Gata bek sosah wahe e adoe
Le Allah sidroe yang nilai hamba
Yang peunteng gata wahe e adoe
Nibak aduen droe ka lheuh ta teuka
Ka ta lake meu’ah ta peujok jaroe
Meunan hai adoe sang ka meumada
Ta lake do’a keudeh nibak Po
Bak saboh uroe beu akor teuma
Udep beu akor aduen ngon adoe
Lage bak saboh uroe yoh ubit gata
Haba ulon meumada ‘ohnoe
Nyo le meucawo meu’ah beuraya
Kadang cit salah yang lon hareutoe
Peumeu’ah jinoe wahe syedara
Seulamat uroe raya ulon peusampoe
Keu aduen adoe keumuen ngon Apa
Geulantoe lon jak ta mumat jaroe
Layeu HP mantong jeut keu perantara.
