- Oleh Tgk. Samuti Sp Mesra
KABARDAILY.COM | CAE –
Salam’alaikom adoe yang cut cut
Keu gata bacut saleum lon sapa
Beurangpat mantong gata menuntut
Sambot adoe cut saleum seujahtra
Nyopat nasehat bak lon na bacut
Yang lon meukeusud beutapeucaya
Bek sagai malah gata bak ta beuet
Wahe adoe cut deungon sikula
Nyo sikula mantong yang gata tuntut
Hana jeut ta beuet rugoe leupah na
Peulom ‘oh rayek gata kon le cut
Teulah kon bacut wahe syedara
Peulom di gata meuh’eut keu Cagub
Wate geutest beuet leupah that gura
Cukop that male nyo h’an jeut ta beuet
‘Oh wate ta beuet teu bata bata
Bak surah pendek sagai geuyue beut
Kadang meuc’at c’eut wate ta baca
Oleh karna nyan wahe adoe cut
Yoh mantong ubet beuteugoh raya
Yoh mantong wate gata mantong cut
Beukayem ta beuet Qur’an ta baca
Bek sagai lale wahe adoe cut
Nyo h’an jeut ta beuet raya that desya
Aneuk keuleubok na di cong bak kruet
Mita ungkot deut di dalam bangka
Nyan keuh nasehat bak ulon bacut
Meu’ah adoe cut nyo salah haba.
