- Oleh Tgk Samuti Sp. Mesra
KABARDAILY.COM | CAE
Assalamualaikum wahe e sahbat
Saleum horeumat jinoe ulon ple
Di pat mantong droe neuh sahbat
Saleum lon intat meusaboh pankei
Na saboh haba ulon neuk ungkap
Keu PON hai sahbat lon keumeuk ratei
Aceh ngon Sumut ji cok keu teumpat
Lage nyan pakat bak saboh watei
Buleun sikureung thon dua empat
Keunoe meusapat cukop that rame
Bandum daerah keunoe meusapat
Wahe e sahbat meumacam mode
Pacuan kuda ngong pencak silat
Laen hai sahbat cabor that rame
Meumacam bidang sesuai teumpat
Tanyoe po teumpat teurimong jame
Geutanyoe jaga jame ngon got that
Bek sampe meuhat geutanyoe male
Tapi laen lom ulah si kaplat
Jih tueung manfaat tanyoe yang male
Awak nyan tueng laba meukali lipat
Tanyoe po teumpat ka ji peumale
Masalah catering cukop that gawat
Kon tanyoe sahbat yang tukang angkei
Troh bu keu atlet na yang ka teulat
Kadang hai sahbat na yang ka mubei
Kadang ka basi bu yang ji intat
Kadang ka teulat kon le bak wate
Sampoe Mentri geutren u teumpat
Jak kalon meuhat nyo meunan lage
Memang na bukti yang Mentri dapat
Beungeh geuh that brat lage nyan mode
Hareuga catering pih ji mark up
Ji tupeu meuhat le ureung rame
Awak luwa yang pajoh mangat
Geutanyoe sahbat yang tanggong malei
Tapi layanan geutanyoe sahbat
Ji peugah ramah that tanyoe le jamei
Na yang tinggai HP dua go meuhat
Ji pulang leugat le ureung teumei
Sampoe geutanyoe ji kheun jujor that
Hate seunang that di ureung jamei
Meunan keuh rakan sama ta harap
Teurimong gaseh that keu ureung teumei
Maruwah daerah ka geupeuseulamat
Aceh syari’at h’an geupeumalei
Deungon wab gobnyan yg jujor that2
Geutanyoe sahbat bandum teuh jithei
Jeh jalo kawe ji arong bakat
Jak kawe sakap deungon ungkot yei
Peumeu’ah ulon wahe e sahbat
Kadang na silap bak lon meuratei.
