- Oleh Tgk. Samuti Sp. Mesra
KABARDAILY.COM | CAE –
Salam ‘alaikom kaom sinaroe
Aduen ngon adoe tuha ngon muda
Sambot saleum lom wahe rakan droe
Lon neuk peusampoe na saboh haba
Keu bh’ah Pilkada lon neuk hareutoe
Wahe e adoe ka di keue mata
Pileh pemimpin oleh geutanyoe
Limong thon sigo lage yang ka ka
Seugoh ta pileh wajeb ta tusoe
Ureung yang bako geu pimpin bangsa
Nyo salah pileh limong thon rugoe
Tanyoe payah moe ta ro ie mata
Bah pih meujanji meumacam bagoe
Tapi geutanyoe bek teupeudaya
Kasep baroe kon bak saboh uroe
Janji ngon tanyoe ji peutrok hana
Ureung yang sulet bek that ta deungo
Geutanyoe rugoe wahe syedara
H’an peu ta pateh awak nyan cakoe
Teuma ‘oh dudoe geutanyoe yang jra
Geutanyoe Aceh beuna ta thei droe
Bek geunap uroe keunong elanya
Meunyo baroe kon ji kheun gop gilho
Awak droe keudroe dudoe elanya
Daerah termiskin ji cap geutanyoe
Padahai jai geutanyoe peng APBA
Aleh ho ji plueng hana ta tuho
Sampoe ‘an jinoe h’an meuho rimba
Na cit leubeh peng kadang sigo go
Payah pulang dudoe u Jakareuta
Nyan keuh dum carong awak geutanyoe
Palei patah go sabe meuraba
Baroe Peh pale rap seupot uroe
Proyek hai adoe h’an leuh ji puga
Nyo h’an lheuh proyek padum na rugoe
Pemborong payah moe ka mate dana
Kon cit bandum lage lon kheun nyoe
Meu’ah ulon nyoe nyo salah haba
Soe yang teupileh nibak kali nyoe
Mari geutanyoe sama ta jaga
Mari ta bangun Aceh lhei sagoe
Nakjeut ta puwoe maruwah bangsa
Bek le meudawa sabe keudroe droe
Ta mumat Jaroe ‘oh lheuh Pilkada
Aneuk leuk kutru di cong bak panjoe
Toktok beuragoe di cong bak jeumpa
Meunyo na salah yang lon hareutoe
Meu’ah ulon nyoe wahe syedara.
