- Oleh Tgk. Samuti Sp. Mesra
Budaya,kabardaily.com
Salam’alaikom rakan lon bandum
Lon peutroh saleum bena syedara
Beurangpat mantong adoe ngon aduen
Yahcut ngon keumuen bandum lon sapa
Na bacut haba ulon neuk sunyung
Keu bh’ah qureubeun lon neuk ceurita
Seubab ka wate wahe e aduen
Uroe raya Qureubeun ka dikeue mata
Nyo na raseuki geutanyoe bandum
Mari qurbeun wahe syedara
Meusoe yang mampu han tem qurbeun
Nabi tanyoe kheun bek toe musalla
Dumnan keuh brat suai qurbeun
Sampoe nabi kheun lage nyan rupa
Lam surah Alkausar Allah pih Geukheun
Geuyue qurbeun bak tanyoe hamba
Nyo h’an neupateh wahe e aduen
Qur’an neuleueng neucuba baca
Raseuki Allah bri keu tanyoe bandum
Dak ta qurbeun tanyoe h’an papa
Nyan jeut keu saboh tanda ta syukur
Deungon qurbeun wahe syedara
Keu ureung gasien jok sie qurbeun
Ureung nyan bandum cit geumeudo’a
Wate geupajoh ‘oh lheuh geutaguen
Fahla meuteumeung nibak rabbana
Keu ureung kaya jeut jok qurbeun
Hadiah geukheun dalam agama
Bukon le sayang ka lon kalon kleueng
Teungoh cok umpeun lam laot raya
Meumada ‘oh noe haba qurbeun
Seumoga maklum wahe syedara
Meunyo cit salah lage ulon kheun
Bak rakan bandum meu’ah beuraya
Hana niet ulon paksa qurbeun
Kadang cit bandum kana rencana.
