- Oleh Tgk. Samuti Sp. Mesra
KABARDAILY.COM – BUDAYA
Assalamu’alaikum wahé e rakan
Inöng ngön agam saleuem ulôn bré
Beurangpat mantöng droeneuh hai rakan
Saleuem lôn tuan sambôt beusaré
Na saboh haba ulôn neuk peutrang
Keu hai sembahyang ta pubuet sabé
Nyo na yang salah tanyoe pubuet nyan
Rugoe hai rakan sayang bukön lé
Rugoe tiep watèe tanyoe tunaikan
Tapi bak Tuhan fahla h’an geubré
Oleh karna nyan ingat hai taulan
Meurunoe rijang yôh gohlom maté
Yôh goh geutanyoe ta woe bak Tuhan
Bèk asai sembahyang wahé boh haté
Beucukôp syarat bèk na yang tinggai
Beudöh hai rakan jak beuet laju lé
Teuma kali nyoe lôn neuk sampaikan
Rukôn sembahyang ingat beusaré
Yang limöng rukôn dalam sembahyang
Cit h’an jeut sagai ta kheun lam haté
Beudeuh keudroe yang tanyoe kheun nyan
Lam fiqih meunan ka lheuh geurawé
Peurtama phôn *takbiratul ihram*
H’an jeut hai rakan sagai lam haté
Beu teudeungö keudroe wahé e rakan
H’an sah sembahyang nyo cit lam haté
Beumeugrak bibi waté ta kheun nyan
Lagée nyan rakan sang ka meusampé
Teuma keudua wahé e rakan
*Fatihah* pih meunan h’an jeut lam haté
Beudeuh cit keudroe wahé e rakan
Nyo kön lagèe nyan rugoe bukön lé
Meunan lam fiqih ka lheuh geupeutrang
Bak bab sembahyang wahé boh haté
Nyo bab thaharah cit phôn geupeutrang
Lam fiqih meunan kalön laju lé
Teuma yang keu lhèe jinoe lôn peutrang
Dalam sembahyang *tahayeut akhé*
Nyan pih h’an jeut lam haté sagai
Ingat hai rakan bandum beusaré
Nyo lam haté sagai geutanyoe kheun nyan
H’an sah cit sembahyang rakan boh haté
Meunan lé teungku pih ka geusampaikan
Inöng ngön agam bèk tuwö teuh lé
Peuet *seulaweut* teuma ‘oh lheuh nyan
Nyan pih hai rakan h’an jeut lam haté
Nyo cit lam haté h’an sah sembayang
Rugoe sembahyang ta pubuet sabé
Teuma keu limöng akhérul qalam
*Saleuem* phôn taulan ‘oh shalat akhé
Nyan keuh limöng nyan wahé e rakan
Bèk tuwö sagai ta ingat sabé
Nyan keuh rukôn *qauli* dalam sembahyang
Saboh bagian ka ulôn rawé
Teuma yang laén jinoe lôn peutrang
*Qalbi* ngön *fi’li* rakan sigö lôn rawé
Yang phôn *berdiri* dalam sembahyang
H’an jeut duek rakan awai ngön akhé
Tapi nyo sakét h’an ék döng sagai
Jeut duek hai rakan peunténg bèk ta pré
Keudua *ruku’* dalam sembahyang
Keu lhèe *i’tidal* wahé boh haté
Keu peut *sujud* nyan pih perbuatan
Rukôn fi’li cit nyan ingat beusaré
Yang keu limöng teuma ‘oh lheuh nyan
*Duek antara dua sujud* pih rukôn fi’lè
Teuma yang keu nam jinoe lôn peutrang
Bèk tuwö rakan *duek tahayeut akhé*
Rukôn *fi’li* nyan ka ulôn peutrang
Dalam sembahyang beuingat sabé
Rukôn *qalbi* yang phôn that rakan
Ban döng sembahyang ta *Niet* lam haté
Teuma *tertib* dudoe hai rakan
Dalam sembahyang pih ingat lam haté
H’an jeut meutuka bandum rukôn nyan
H’an sah sembahyang nyo meutaka také
Nibak ulôn nyoe na bacut peusan
Pubuet sembahyang bèk sagai ta pré
Meunyo baroekön na cit yang tinggai
Taubat beurijang yôh gohlom maté
Nyo ka ta taubat wahé e rakan
Ampônan Tuhan keu tanyoe geubré
Maha peungampôn Allahurahman
Buet yang salahan bèk ta ulang lé
Meumada ‘ohnoe akhirul qalam
Bh’ah rukôn sembahyang ka ulôn rawé
Meunyo cit salah lagèe lôn karang
Peubeutôi rijang yang salah rawé*
Sp. Mesra, 7 September 2026.
