- Oleh Tgk. Samuti Sp. Mesra
KABARDAILY.COM | BUDAYA
Assalamu’alaikum kawôm lam nanggroe
Saleuem ulôn nyoe kirém keu gata
Lôn kirém saleuem keu lakoe binoe
Rakan lam nanggroe bandum lôn sapa
Beurangpat mantöng jinoe rakan droe
Sambôt beusigö saleuem seujahtra
Gantoe meureumpök ta mumat jaroe
Malam ngön uroe ta meupoh cakra
Geutanyoe bahas masalah nanggroe
Ka cukôp kasyo lôn deungö haba
Alèh cit beutôi lagèe nyan bagoe
Ci kalön sigö wahé syèdara
Na bacut haba lôn neuk hareutoe
Keu masalah nanggroe lôn ci ceurita
*Pabrék sabu kana bak tanyoe*
Wahé e adoe daerah tanyoe ka maju raya
Yang peureulèe sabu ka toe ji jak bloe
Peureulöh nanggroe ka mangat raya
Awak cina pih ka ji ba keunoe
Untuk peurunoe peugöt narkoba
Awak nyoe ka caröng awak nyan jiwoe
Tinggai awak nyoe yang peureulöh bangsa
Awak cina singöh ji prok-prok jaroe
Tanyoe payah moe wahé syèdara
Yôh goh na pabrék mantöng di sinoe
Neukalön keudroe dumna narkoba
Peulom pabrék kana bak tanyoe
Aceh lhèe sagoe singöh ancô geulaha
Untông pih pabrék ka awai boco
Meuh’an ka paloe wahé syèdara
Meunan keuh cara peusiblah lé Po
Usaha awak nyoe Allah h’an ridha
Menyo cit trép lom pabrék tan boco
Ka cukôp paloe generasi muda
Nyo rusak bandum rata jeut sagoe
Pemimpin nanggroe payah that mita
Baroekön Aceh ji thèe u luwa nanggroe
Bak saboh tèmpo yôh masa jaya
Teuma jinoe neukalön keudroe
Ureueng bako pih ikôt peureulöh bangsa
Anggota dewan pih sabu ji engkhoe
Peulom awak nyoe yang muda-muda
Ta kalön ji drop karap tiep uroe
Awak nyan adoe aléh h’an jra-jra
Bapak kapolri ka teuka keunoe
Pabrék sabu sinoe geujak paréksa
Daerah produsèn ka ji cap tanyoe
Wahé rakan droe ho taba muka
Nanggroe syari’at gelar Aceh nyoe
Pakön kana jinoe pabrék narkoba
Awak luwa dum ji prok-prok jaroe
Yang peumalèe tanyoe cit awak sibangsa
Hai bapak kapolri ureueng yang bako
Permintaan kamoe neudeungö sigra
Neuhukóm awak nyan beubrat h’an bagoe
Bèk sagai neudengö alasan ji ba
Beuthat alasan meumacam bagoe
Untuk peulheuh droe meumacam cara
Ji tém bayeue dum h’eut geutanyoe
Asai awak nyan keudroe beubébaih teuma
Aneuk burujuek di công bak panjoe
Umpung geumoto di công bak jeumpa
Haba lôn tuléh meumada ‘ohnoe
Nyo salah rampoe meu’ah beuraya*
Sp. Mesra, 24 Oktober 2026.
