Haba Peuingat Keu Anggota Dewan
- Oleh Tgk. Samuti Sp. Mesra
KABARDAILY.COM | CAE
Salam’alaikom wahe e wareh
Saleum sibareh cit keu syedara
Beurangpat mantong sinoe ngon sideh
Hana lon peuceh ulon peusama
Na bacut haba lon keuneuk tuleh
Haba keu wareh sira meudo’a
Do’a bak kamoe jinoe lon peuceh
Keu bandum wareh be na anggota
Keu anggota dewan yang ka teupileh
Bak kamoe wareh do’a that raya
Kamoe meudo’a deungon ate gleh
Dewan teupileh geubri seujahtra
Harapan kamoe h’an meunoe meudeh
Ban janji wareh beuneulaksana
Ubena janji ka kamoe tuleh
Bek na hai wareh yg droe neuh langga
Nyang ka neujanji ingat beuabeh
Meunyo neulanggeh droeneuh meudesya
Desya bak Allah wate trok keudeh
Apui yang peudeh ka teuseudia
Meunyo lam donya jeut meunoe meudeh
Tapi trok keudeh be ok tan daya
Anggota tuboh saksi di sideh
Babah teuh wareh hana bicara
Bumoe Aceh nyoe ka leupah seudeh
Ji cap hai wareh gasien lumboi sa
Teuma kali nyoe hai dewan teupileh
Neu ubah keudeh gelar yang kana
Gelar lumboi sa neucoret keudeh
Bah ji cok blah deh ho laen teuma
Kamoe peucaya bak droe neuh wareh
Jeut keuh kamoe pileh wahe syedara
Neucuba sigo meu’en beugleh gleh
Bek sagai wareh neumita laba
Bek lage yang ka bak gob di sideh
Tugaih goh abeh ka lop penjara
Wate lage nyan kon cukop seudeh
Jeh si nyak puteh sosah jih raya
Karena cut bang buet ka meulanggeh
Hingga paya eh dalam penjara
Di donya mantong ka teulah abeh
Peulom trok keudeh u keue Rabbana
Oleh karna nyan ingat beuabeh
Lage ban gareh meunan keureuja
Lon ucap seulamat keu bandum wareh
Seulamat wareh dalam keureuja
Beujeut keu amai sampoe trok keudeh
Fahla geutuleh oleh Rabbana
Toktok beuragoe di cong bak manggeh
Di cong keureuleh na ticem pala
Meunyo na salah haba lon tuleh
Wahe e wareh meu’ah beuraya.