Oleh : Tgk Samuti
CA’E ACEH—-
Salam’alaikom warahmatullah
Poma ngon ayah adoe deungon A
Bandum syedara lon lake meu’ah
Kadang meusalah bak ta meucakra
Ca’e lon tuleh bah pih sipatah
Kadang cit salah meusireuk haba
Hana lon saja adoe meutuah
Peu-peu yang leumah roh lon ceurita
Lon kalon jamok bak ji p’iep darah
Sinan hai nyak Lah lon peuphon haba
Rupajih jamok ‘oh ji p’iep darah
Nyo jih ka mirah baro ji bungka
Meunyo jih ka troe baro ji minah
Nyo keunong ramah teuntei binasa
Ji sambe nyawong mita nafakah
Bah keunong ramah hana ji kira
Ji kheun bak aneuk wate ji langkah
Gata lon keubah siat aneuknda
Tanyong le Aneuk bak poma bagah
Nyo ka neulangkah pajan neugisa
Meunyo meurampeh lon gisa bagah
Hana peu sosah dikah aneuknda
Meunyo meuginton aneuk meutuah
Ka teuntei bak kah han le ku gisa
Meunan keuh tamse teungku meutuah
Mita nafakah di dalam donya
Mita yang haleue hareum ta keubah
Meunan peurintah dalam agama
Bak yang hareum bek tameureupah
Ingat beuleumpah wahe syedara
Ingat keu dasya nibak Potallah
Lam apui mirah tanyoe geusingkla
Wahe syedara lon lake meu’ah
Ka roh lon peugah ho laen haba
Jinoe lon puwoe nibak phon kisah
Tukang p’iep darah dalam calitra
Seulaen jamok syeara meutuah
Ringet ngon reugah darah ji mita
Meunyo lheuh suboh u blang ta langkah
Ringet ngon reugah tanyoe ji seuba
Yang hireuen teuh that ringet ngon reugah
‘Oh ji p’iep darah meutathei hana
Badan jih haloh cit kureung leumah
‘Oh lheuh jih minah gatai teuh raya
….. Bersambung.
