Oleh : Tgk Samuti
CA’E ACEH—-
Deungon bismillah haba lon peuphon
Rindu keu Gampong lon neuk ceurita
Peulom puasa ka trok bak ujong
Seumaken rihon ate lam dada
Kamoe di ranto wahe rakan lon
Ingat keu gampong cit han tom reuda
Nyo tan kamoe woe lam sigo sithon
Sang2 syeara lon hana meurasa
Saweu syedara sigo lam sithon
Jak peulheuh rihon bak uroe raya
Ta mumat jaroe ngon bandum kawom
Lakee beuampon ubena desya
Ubena salah dilee ka sithon
Meu’ah ngon kawom bak uroe raya
Ban lheuh shalat ‘led hana woe langsong
Jaroe ta sambong peumeu’ah dasya
Tapi bak thon nyoe laen rakan lon
Rame u gampong yang han jeut ta gisa
Ji boh atoran bek woe u gampong
Ji kheun hai kawom seubab Corona
Le that atoran jinoe ji suson
Rame meukumpoi pih jitham raya
Meunyo awak nyan ji peugot konser
Sinan meukumpoi dum penguasa
Nyo buet awak nyan han jeut ta teugor
Meusoe yang teugor tamong penjara
Meunan keuh jinoe wahe rakan lon
Tanyoe rakan lon ta saba-saba
Di cong bak Ara ji meusu tiong
Umpung cem murong bak ujong bara
Meu’ah syeara ka silap ulon
Ka meuwet Ujong ca’e lon rika
Lon keuneuk peugah rindu keu gampong
Karoh keu konser meuliwet haba
Cit han ek ta theun wahe rakan lon
Laen ji ong-ong laen keureuja
Meunyo geutanyoe han jeut meukumpoi
Awak nyan konser lam geudong raya
Buleun puasa ji peugot konser
Ureung meuhudom rame leupah na
Jinoe laen lom awak nyan ong-ong
Hanjeut meukumpoi bak uroe raya
Shalat ‘id mantong ji tham rakan lon
Alasan ji rhong seubab corona
Ka sep keuh ‘ohnoe ca’e lon suson
Meunyo lon sambong jioh meuputa
Jinoe puasa ka trok bak ujong
Meu’ah desya lon bak uroe raya.
