fbpx

PUASA KA AKHE

  • Oleh Tgk Samuti Sp Mesra
    Episode 2

KABARDAILY.COM  |   CAE

Keu bh’ah puasa jinoe lon Sambong
Ka troh bak ujong wahe syedara
Singoh beungoh laju meusambong
Wahe rakan lon ngon uroe raya

Sibuleun geunap geuyue le Rabbon
Bak tanyoe kawom geuyue puasa
Geutanyoe theun droe mangat ta muphom
Pakri keuh euntong kawom dhu’afa

Tanyoe rasa deuk hana asoe lhong
Meunan keuh euntong kawom dhu’afa
Oleh karna nyan meunyo ka muphom
Jak tulong meulong wahe syedara

Ta tulong ureung yang goh beuruntong
Meunan syedara lon suroh Rabbana
Nyo h’an neupateh lage haba lon
Jak tanyong langsong nibak ulama

Cit meunan geuyue le sidroe Rabbon
Wahe rakan lon beutapeucaya
Nyo na raseuki tanyoe adoe lon
Ta sisih langsong meualakada

Keu ureung gasien keunan ta usong
Bek hai syeara lon tanyoe kriet raya
Lam atra tanyoe beutanyoe muphom
Sinan meukumpoi ngon hak dhu’afa

Nyo ka troh nisap zakeut ta peutren
Meunan cit Rabbon geuyue bak hamba
Akhe puasa wahe rakan lon
Pitrah ta seuon keudeh ta jak ba

Keudeh bak tgk ta jak jok langsong
Atau adoe lon jok bak panitia
Pakri yang reusam di dalam gampong
Yang peunteng rakan lon bek dawa2

Lheuh geutrimong le Tgk Gampong
Geubagi langsong laju beusigra
Meubek geupeupreh lage saboh thon
Bagi keu kawom bak uroe raya

Burujuek bale di cong bak rambong
Jeh ticem murong bak Ulee bara
Meunyo cit salah haba bak ulon
Peumeu’ah ulon wahe syedara