- Oleh. Tgk. Samuti Sp. Mesra.
KABARDAILY.COM | BUDAYA
Assalamu’alaikum rakan lam nanggroe
Sambôt rakan droe saleuem seujahtra
Saleuem horeumat ulôn bet jaroe
Lakoe ngön binoe sigö lôn sapa
Hana lôn bèda keu beurangkasoe
Rakan lam nanggroe lôn peumulia
Peumulia warèh cit adat geutanyoe
Meunan hai adoe kheun ureueng tuha
Na bacut haba lôn neuk peusampoe
Masalah nanggroe lôn neuk ceurita
Jinoe ka beutôi kön haba lumpoe
Ka viral adoe bandum dalam media
Ka ji meupaké sabé keudroe-droe
Pemimpin nanggroe jinoe ka ji meudawa
Do’a rakyat le sang ka geukabul lé Po
Watèe kampanye bak saboh masa
Sabé yang dhalém ta lakèe beu ji meulhö
Wahé rakan droe jinoe ka nyata
Jenderal polisi jinoe ka ji bôh taloe
Ji drop lé awak droe karena sadap istana
Peut droe jenderal yang ji bôh taloe
Mantan kapolri sidroe ka jeut tersangka
Jih yang peurintah bak awak lhèe droe
Di ateuh lom adoe teungöh ji mita
Bajèe awak nyan jinoe ka meugantoe
Ngön bajée oren adoe jinoe ka ji tuka
Bajèe coklat jinoe hana lé meuho
Watèe ka lagée yoe barô ji rasa
Ta prèh-prèh mantöng olèh geutanyoe
Haba ta deungö dalam berita
Rata media cit ka bandum ji rampoe
Tanyoe rakan droe saréngan beuna
Kadang na berita lam padum uroe
Ta prèh hai adoe deungön ta saba
Meuban ka jeulaih punca ka meuho
Barô geutanyoe haté teuh leuga
Jinoe peu tujuan yang yue goh meusoe
Goh jeulaih adoe peu ji reuncana
Menyo yang yue singöh ka meusoe
Ka jeut cit bôh taloe tamöng penjara
Nyan keuh akibat yôh saboh uroe
Ka ta piléh lé tanyoe yang mangat haba
Ka ta patéh janji yang mangat tuloe
Ban ka lagèe nyoe droe cit yang rasa
Nyo gop peuingat cit h’an ta deungö
Ta kheun lé tanyoe peu-peu yang hawa
Ho ka gata yang pujoe-pujoe
Watèe lagée nyoe h’an deuh lé rupa
Ban trôk bak watèe ka karu nanggroe
Bandum teuh sigö lam menderita
Untông yang peukaru jinoe ka meusoe
Ka teunang tanyoe bacut ta rasa
Alèh untuk kudeta singöh bak saboh uroe
Mangat nanggroe nyoe jeut ji kuasa
H’an sép baroekön ka ji peukasyo
Jinoe hai adoe ji neuk peugisa
Nyan keuh akibat ta rasa jinoe
Nyo pemimpin nanggroe ileumèe hana
Agama kureung droe tan ji tusoe
Sang bak geutanyoe yang bako hana
Aneuk burujuek di công bak kiroe
Tok-tok beuragoe di công bak jeumpa
Meunyo cit salah haba lôn rampoe
Meu’ah rakan droe yang ulôn pinta
Hana niet lôn kheun keu beurangkasoe
Tapi ban ka lagèe nyoe h’an ék ta saba
Beuingat-ingat bandum geutanyoe
Piléh pemimpin nanggroe beuteugöh raya
Piléh yang caröng ureueng yang bako
Bèk piléh lé tanyoe yang jeulaih hana
Bèk gara-gara ji jôk sembako
Martabat ta publoe murah hareuga*
Sp. Mesra, 4 November 2026.
