Oleh : Tgk Samuti
CA’E ACEH—
Untong pih nyan lakoe si nyak Mah
Saba sileupah wahe teungku droe
Keu hai sosial hana peu peugah
Ji meuseudeukah karap tiep uroe
Sabe ji bantu ureung yang sosah
Lakoe si nyak Mah cukop that bako
Ureung pih malem rupa pih gagah
Tapi si nyak Mah hana ji thei droe
Ka cukop cangklak jinoe si nyak Mah
Si dara ceudah maken meupaloe
Meubek ta ikot lage nyan tingkah
Murka ngon Allah nyo ta dhot lakoe
Beusopan santon haba ta peugah
Geuyue le Allah wahe sambinoe
Meunan cit gata lakoe meutuah
Kon aneuk buah keu ureung binoe
Beusama-sama ta musyawarah
Meusoe yang salah ta mumat jaroe
Ta lake meu’ah meunyo na salah
Bek gata keubah sampoe lhei uroe
Nyo lakoe mate goh ji peumeu’ah
Rugoe ibadah sampoe itam dhoe
Oleh seubab nyan adoe meutuah
Sabe ta meu’ah ngon yah si putroe
Kadang bak geujak mita nafakah
Gobnyan pih tewah ji pok le moto
Meunyo gobnyan jak lheuh lake meu’ah
Han le meusalah bah pih deungon Po
Meumada ‘ohnoe ca’e lon surah
Lon lake meu’ah wahe e adoe
Peulom lam ca’e na nan si nyak Mah
Kon cit si nyak Mah yang di gampong nyoe
Nyan lon boh miseu lon peupaih arah
Pakhok bek salah meucawo-cawo
Mangat got buhu wate ta surah
Mangat that indah meunyo gop deungo.
TAMMAT.
