Oleh : Tgk Samuti
CA’E ACEH–
Sagai han jitem tuka amanah
Lage peurintah di jih han tuwo
Nyo na raseuki geubri le Allah
Lakoe si nyak Mah han pajoh sidroe
Meunyo ji kalon bawahan sosah
Ji tanyong bagah pakon lage nyoe?
Peuseubab gata that apoh apah
Bak lon ta peugah jeut ta seuleusoe
Jareung ta teumeung lage nyan ulah
Yang mat peurintah nibak jameun nyoe
Yang cukop that le adoe meutuah
Nyo na peunayah ji pajoh sidroe
Hana ji Pike keu aneuk buah
Yang apoh apah lam tarek uroe
Meunyo buet yang hek jok aneuk buah
Nyo na peunayah ji pajoh sidroe
Ureung lage nyan adoe meutuah
Seuramoe Mekkah hana meusidroe
Yang cukop that le lage lon peugah
Sideh hai ayah di luwa nanggroe
Meunyo na sinoe lage lon peugah
Laju neu ubah beuna neuthei droe
Hareuta hareum bek that neuramah
Keu hukom Allah droe neuh bek tuwo
Meu’ah hai teungku ulon ka latah
Ka roh lon peugah lage nyan bagoe
Padahai di lon cit lon neuk peugah
Keu hai si nyak Mah kuat dhot lakoe
Beuthat ji tupeue uleh si nyak Mah
Lakoe meutuah hek that ban jiwoe
Ji yue intat droe bak salon mewah
Han ji jeut bantah le teungku lakoe
Nyo agam laen hana peu peugah
Boh dua blaih paih ka ji jok sigo
Meunyo cit akai hana Meu ubah
Beuthat pih ceudah payah eh sidroe
…..bersambung.
