- Oleh: Tgk Samuti
KABARDAILY.COM – CAE ––
Salam’alaikom warah matuhu
Saleum keu guru bak lon seukada
Ngon jasa gobnyan geutanyoe maju
Ta turi ma ku deungon Rabbana
Rayek that jasa banmandum guru
Ureung petupeu tuleh ngon baca
Han jeut teumuleh nyo hana guru
Han jeut hai tgk tanyoe meubaca
Nibak saboh jan meuploh thon lalu
Keu sidroe guru cukop mulia
Bandum horeumat keu tuan guru
Jinoe hai abu ka jioh beda
Meubacut geu dhot le sidroe guru
Ka ji woe laju jak peugah bak ma
Langsong geujak yah jak mita guru
Deungon mata hu geujak seurapa
Peu lom na geupoh bacut le guru
Wab ji peukaru ubena siswa
Aneuk geuh batat pura han tupeue
Bak polisi laju lapuran geu ba
Meunyo lage nyan pajan keuh maju
Keu tugaih guru tan ta peucaya
Lapuran aneuk bek pateh laju
Hana niet guru ilanya siswa
Geudidik siswa ngon geubri ilmu
Nak ji turi ma ku ileumei pih na
Meunan meukeusud le sidroe guru
Beuna neutupeue wahe syedara
Meumada ‘ohnoe haba lon ramu
Meu’ah hai teungku nyo salah haba
Harapan ulon bak bandum guru
Geutanyoe guru beurayek saba.
