- Oleh : Tgk. Samuti Sp. Mesra
KABARDAILY.COM | BUDAYA
Assalamu’alaikum kawôm sinaroe
Aduen ngön adoe bandum lôn sapa
Keu tuha ngön muda ulôn bet jaroe
Lakoe ngön binoe sigö lôn sapa
Saleuem lôn kirém lèwat ca’e nyoe
Geulantoe tanyoe meureumpök muka
Tanyoe jép kupi ta pajôh tumpoe
Bak saboh uroe kadang syèdara
Na saboh haba lôn neuk hareutoe
Nanggroe geutanyoe jinoe dalam bahaya
*Asap yang jiôh nyoe ka trôk keunoe*
U gampông tanyoe jinoe ka teuka
Meunyo baroekön cuma ta deungö
Olèh geutanyoe daerah luwa
Di Kalimantan memang ka cukôp paloe
Rata jeut sagoe ka tutông rimba
Masyarakat sôsah hana soe pako
Yang meunan jinoe cit ka beasa
Yang cok manfaat memang cit meusoe
Akibat dudoe rakyat yang rasa
Awak nyan ji plueng u luwa nanggroe
Tinggai geutanyoe nanggroe konoha
Tanyoe theun asap malam ngön uroe
Tapi bak pejabat adoe mangat that haba
Seubab awak nyan lam AC moto
Di kantô adoe sinan pih sama
Jiwoe u rumoh pih meunan bagoe
AC cit adoe rata jeut kama
Geutanyoe rakyat lam tarék uroe
Cit hana pré uroe asap ta seuba
Peulom lam pasai sinan meusaho
Ci piké keudroe wahé syèdara
Uteun ka abéh yang tet alèh soe
Nyan kön lé sigö wahé syèdara
Yang pula sawét ban ka gléh bumoe
Nyan keuh awak nyoe patôt ta duga
Lam Al-Quran ka jameun Allah peusampoe
Yang peurusak bumoe cit manusia
Laôt ngön darat kön reulöh keudroe
Bandum buet jaroe ureung durjana
Dalam surah Ar-Rum ci kalön keudroe
Wahé rakan droe ayat peut plôh sa
Cukôp that jeulaih Allah hareutoe
Röt Nabi tanyoe Saidil Ambia
Ngön seubab ureung yang brôk peurangoe
Trôk u luwa nanggroe tanyoe ji seurapa
Awak Malaysia ji kheun keu tanyoe
Kok sembrono negara konoha
Nyo awak nyan tuntut ka cukôp paloe
Oleh prabowo kadang ji piké hana
Ngön peulen apui ci kalön keudroe
Ie yang ji peupö pih leumöh raya
Teuga ji pö ie ‘oh ji lét awak yang demo
Ci kalön keudroe kön lôn yang peuna
Ngön helikopter nyo di luwa nanggroe
Ngön pesawat adoe Awak Malaysia
Tapi ci bandéng ngön nanggroe tanyoe
Ka teukhém keudroe teuh ta kalön rupa
Pajan maté apui nyo meunan bagoe
Seumprot ngön jaroe ‘oh tutông rimba
Beuthat moto pemadam ji ba tiep uroe
H’an jeut that ji peutoe keuna lam rimba
Pesawat pemadam pakön h’an ji bloe
Bèk yang that ji pakoe keu koperasi desa
Honda treil pih ji kheun ji neuk bloe
Nyan pih ci piké keudroe peukeuh na guna
Na lom yang laén geutanyoe deungö
Penerjun payông adoe pih keunan ji ba
Nyan keuh dum caröng pejabat tanyoe
Lam sejarah barô nyoe yang meunan cara
Memang baroekön h’an tom ta deungö
Kadang ureueng yang bako yôh nyan gohlom na
Teuma jinoe pejabat le that yang bako
Jeut keuh meunoe dum ka reulöh donya
Peng BNPB pih ka ji tém eungkhoe
Wahé rakan droe lé si durjana
Aneuk siwah di công bak panjoe
Tok-tok beuragoe di công bak jeumpa
Ca’e lôn tuléh meumada ‘oh noe
Meunyo meucawö Meu’ah beuraya
Hana niet lôn kheun keu beurangkasoe
Tapi ta ubah jinoe soe yang meurasa
Mari geutanyoe ta jaga bumoe
Keu aneuk cuco singöh jeut tueng pusaka*
Sp. Mesra, 16 Oktober 2026.
