Oleh : Tgk Samuti
CA’E ACEH—-
Kisah nabi Hud pih na geupeutrang
Dalam Al Qur’an surah ASY SYU’ARA
Awak nyan ingkar Sabe keu Tuhan
Akhe awak nyan geupeubinasa
Geupeutren awan yang cukop itam
Ngon angen topan pih leupah teuga
Ji bapot rumoh be na bangunan
Yang tan meuiman abeh binasa
Kisah nabi Saleh na cit gileran
Geuseubot sinan oleh Rabbana
Keu ummat Saleh nibak wate nyan
Bala bak Tuhan pih cukop raya
Ummat nabi Luth pih saboh macam
Ngon Sabe Agam ji pubuet zina
Cukop that zalem nibak wate nyan
Kheun Rasul Tuhan ji deungo hana
Geubalek bumoe le Tuhan yoh nyan
Bandum awak nyan abeh binasa
Purumoh nabi Luth pih sinan tinggai
Seubab inong nyan syetan peudaya
Kisah nabi Syu’eb na cit hai rakan
Geuseubot sinan lam Asy Syu’ara
Geupeutren bala yoh
nyan le Tuhan
Teutop Ngon awan han leumah donya
Wahe syedara inong ngon agam
Cok peulajaran ‘oh teuka bala
Bala Corona jinoe geujok le Tuhan
Taobat beurijang bek le preh losa
Meunyo nibak gop na ta meu utang
Bayeu beurijang yoh goh ta bungka
Peulom yang ta cue nibak saboh jan
Yoh goh ta pulang mantong meudasya
Meunyo korupsi laen lom macam
Hana ho pulang wahe syedara
Hak ureung rame yang tanyoe kuran
Dasya bak Tuhan amponan hana
Meumada ‘ohnoe ca’e lon karang
Tanggai Dua Nam dalam Rahsia
Meunyo rakan lon meuh’eut leubeh trang
Neucok Al Qur’an neucuba baca
Seubab di sinan Kana jawaban
Surah DUA PLOH NAM lam ASY SYU’ARA
Kadang cit salah lage lon karang
Wahe e rakan peubeutoi teuma.
TAMMAT.
