- Oleh Tgk. Samuti Sp. Mesra
Salam ‘alaikum wahe e akhi
Saleum ulon bri lon peumulia
Lon keuneuk kisah na saboh rawi
Haba tsunami lon ulang rika
Seubab ka tuwo dum generasi
Musibah tsunami teuingat hana
Wate ta kalon jinoe hai akhi
Daerah syar’i ka ji peunoda
Nyo gop kheun meunan mata pih ta blie
Beungeh ta peuri wahe syedara
Tanyoe tan sadar wahe e ummi
Ka le buet keji yang ta keureuja
Ta kalon mantong muda ngon mudi
Bak Keude kupi ji poh-poh cakra
Keu jula malam hana padoli
Peu lom na waifi ka teusedia
Laen lom macam ‘oh ta perhati
Bak bineh kali ji duek meubanja
Nibak bineh krueng ji meukat kupi
Ato kurusi sinan meubanja
Inong ngon agam ji duek meureuti
Hana padoli uroe ka sinja
Beuthat ka mugreb mantong ha hi hi
Dak jeut hai akhi ta peugeulawa
Adak na WH hana meuarti
Tan ji patroli ‘oh karap sinja
Meunyo baroekon beda hai akhi
Cit ula ili ta kalon W H
Keudeh ngon keunoe jijak patroli
Nanggroe syar’i got that dijaga
Pakon ka jinoe wahe pak Wali
Peu keu WH patroli ka tan le dana
Pakon ka tabeue wahe pak wali
Peu neupreh tsunami kali kedua
Wahe e rakan muda ngon mudi
Nanggroe serambi bek ta peuhina
Bek ngon wab gata buet saban sakri
Bala ‘oh geubri bandum tarasa
Meunan cit wahe yg meukat kupi
Gata hai akhi beuna etika
Wate lheuh mugreb gata mulai
Meunan bak sang hi cit meuseunia
Hase meneukat beurkah Tuhan bri
Ek ta jak u haji bak saboh masa
Meumada ‘ohnoe haba lon rawi
Meu’ah beuneubri nyo salah haba
Karoh lon peugah keu awak jep kupi
Keu muda mudi ka lon cerita
Mulai jinoe wahe e akhi
Nanggroe Serambi sama ta jaga
Seumoga bala bek le
Tuhan bri
Rahmat beugeubri keu bandum warga….
