- Oleh Tgk. Samuti Sp. Mesra
KABARDAILY.COM | BUDAYA
Assalamu’alaikum kawôm Mak Bapak
Saleuem meusigak ulôn peusampoe
Geulantoe keunan beutrôk ulôn jak
Bak Bapak ngön Mak ulôn peusigö
Jeut ta duek-duek ngön Bapak dan Mak
Nanggroe ka rusak jeut ta hareutoe
Nyo pat bak ulôn na haba si krak
*Tanyoe ka ji gasak* judul kali nyoe
Watèe ta ingat sakét lam utak
Tanyoe ji yue peutak ho laén nanggroe
Nyo ta kheun suram nanggroe hai bapak
Laju ji yue jak bèk tinggai sinoe
Neu cuba piké peukeuh na utak
Sang-sang hana hak tanyoe di sinoe
Pakön ji jeut kheun meunan ji lantak
Meunyo na utak teuntèe h’an meunoe
Nyo na ji piké seugohlom ji pr’ak
Nyan barô bijak pemimpin nanggroe
Tanyoe deungö pih h’an sakét utak
Nyo haba bijak mangat ta deungö
Mentri hukôm jinoe pih cukôp teukeusy’ak
Haba yang jih pr’ak haté teuh seungkoe
Awak koruptor ji kheun jeut damé hai pak
Hana payah jak peugah nibak si wowo
Jinoe jameuen nyoe cit ka brat rusak
Asai pejabat pr’ak haba cit ka meupaloe
Geutanyoe deungö dada teuh seungkak
Keu masalah pajak pih ka cukôp kasyo
H’an jeut pasoe minyeuk moto tan pajak
Ka meunan ji pr’ak barô-barô nyoe
Bak spbu pih keunan ji neuk jak
Paréksa pajak honda ngön moto
Meunyo ka meunan awak nyan gasak
Pakri keuh hai pak nasip rakyat nyoe
Bak bandum lini ji neuk cok pajak
Bak yang jak ngön tapak pih jineuk peusigö
Nyo sipatu rayek kadang le ji cok pajak
Karna rayek tapak ta gilhö bumoe
Bak itangèn pih ji keuneuk gasak
Ji neuk cok pajak cit wahé rakan droe
Bak televisi sinan pih ji neuk cok pajak
Le ji cok pajak nyo meuh’ai ta bloe
Nyo rayek tivi teuntèe le pajak
Meunyo meununggak ji sita tivi geutanyoe
Bak saboh uroe kadang u rumoh ji jak
Pingan ngön tabak ji bileung keudroe
Padum yum ta bloe beulangöng ngön rak
Nak meudum pajak bayeue lé tanyoe
Kadang trôk lam kama singöh pih ji jak
Bajèe ngön simpak ji catat sigö
Siluweue ngön ija krông ji eu meusawak
Nyan pih ji cok pajak kadang bak saboh uroe
Rata jeut sagoe tanyoe ji palak
Cukôp that rusak ka pemimpin nanggroe
Malah le that lom yang keunöng pajak
Tanyoe ji gasak rata jeut sagoe
Bak investor asèng ji peupré pajak
Mangat ji tém jak awak nyan keunoe
Meunan ji peugah lôn deungö si krak
Aléh beutoi bapak lagèe nyan bagoe
Meunyo cit beutoi muesoe yang h’an glak
Ji lakèe teunak lé awak nyan keudroe
Bak takue rakyat jinoe cit ka ji bôh pak
Makén meuceukak dalam nanggroe droe
Di công bak kulu na aneuk ak ak
Ateuh bak salak eumpung geumoto
Meumada ‘ohnoe haba lôn sawak
Nyo salah hai bapak meu’ah ulôn nyoe*
Sp. Mesra, 3 Agustus 2026.
