fbpx

Mari Puasa Syawal

  • Oleh Tgk Samuti Sp. Mesra

KABARDAILY.COM  |  CAE

Salam ‘alaikum warahmatullah
Saleum sipatah lon keu syedara
Na saboh haba ulon neuk peugah
Keu bh’ah ibadah lheuh uroe raya

Puasa Syawal wahe e sahbah
Kheun rasulullah cukop le fahla
Puasa Ramadhan sibuleun sudah
Jinoe ta tamah wahe syedara

Deungon nam uroe geutanyoe tamah
Nilai jih sahbah sithon puasa
Meunan umpama fahla bak Allah
Meunan Rasulullah geumeusabda

Mari geutanyoe rakan meutuah
Sabda Rasulullah tanyoe laksana
Puasa Syawal pubuet hai sahbah
Nilai bak Allah sithon puasa

Puasa Ramadhan ngon puasa Sunnah
Balasan Allah cit h’an terhingga
H’an ek ta uko balasan Allah
Rakan meutuah beutapeucaya

Yoh mantong wate ta pubuet bagah
Geubri le Allah sehat anggota
Manfaat keu tuboh cit laju leumah
Ngon seubab sahbah tanyoe puasa

Tuboh teuh mangat h’an apoh apah
Peulom hai sahbah nyo ka beasa
H’an meubacut meuri deuek ngon grah
Rahmat bak Allah geubri keu hamba

Nyo kon puasa cit apoh apah
Peu-peu yang lemah dak jeut ta seuba
Nyo peureule sehat rakan meutuah
Puasa Sunnah neuci laksana

Meunan geujanji le Rasulullah
Kon lon yang peugah wahe syedara
Wate ta jak beuet sideh di dayah
Na cit geupeugah uleh ulama

Burujuek bale di cong bak lipah
Aneuk siwah di cong bak bangka
Meumada ‘ohnoe haba lon surah
Meunyo cit salah meu’ah beuraya

Kon lon peurunoe utoh teumarah
Kon cit lon ceuramah di keue ulama
Ube lon tupeu nyan keuh lon peugah
Keu lon yang peugah pih jeut meuguna.