Oleh : Tgk Samuti
CA’E ACEH—
Salam’alaikom tanglong buleun trang
Keu bandum rakan tuha ngon muda
Sambot saleum lon wahe e rakan
Lewat siaran lam donya maya
Na bacut haba ulon neuk peutrang
Uroe makmeugang lon neuk cerita
Musem Corona cit bansaboh nyan
Tapi makmeugang pih han jeut hana
Meunyoe di Aceh ji tham makmeugang
Ka jadeh jeut prang meunan keuh rasa
Adak pih bacut bloe sie wate nyan
Asai makmeugang di Aceh beuna
Tapi lawet nyoe beda atoran
Peugot makmeugang ta kira-kira
Geu ato jarak lapak sie meugang
Seubab hai rakan musem Corona
Seubab na wabah wahe e taulan
Pateh atoran bek tanyoe langga
Peu lom singoh phon tamong ujian
Buleun Ramadhan singoh ka teuka
Tanyoe meudo’a keudeh bak Tuhan
Beusehat badan bandum anggota
Bahpih pajoh sie uroe makmeugang
Peungaroh badan bek tanyoe rasa
Na bacut peusan bak ulontuan
Keu bandum rakan yang kaya-kaya
Meunyo geutanyoe na kemudahan
Bantu hai rakan ureung dhu’afa
Keu aneuk yatim beuta sisihkan
Bacut bantuan seu alakada
Peulom teutangga deungon aneuk nyan
Keu sie makmeugang kadang Ngon jibloe hana
Meumada ‘ohnoe haba makmeugang
Meu’ah lontuan wahe syedara
Bekna meusalah sangkot ngon rakan
Peulom ramadhan ka di keue mata.
