- Oleh Tgk. Samuti Sp. Mesra
KABARDAILY.COM | BUDAYA
Assalamu’alaikum rakan boh haté
Ulôn peusampé saleuem keu gata
Saleuem seujahtra bak lôn sitangké
Hana ulôn bré kupi ngön bada
Saleuem bak ulôn bandum beusaré
Awai ngön akhé ulôn peurata
Tuha ngön muda di gampông di glé
Neusambôt saré deungön geumbira
Na saboh haba ulôn neuk rawé
Sampoe ‘an akhé beuneutém baca
*Harap keu pageue keubeue lam padé*
Nyo salah rawé meu’ah beuraya
Haba lôn tuléh di dalam ca’e
Ulôn bôh tamsé lagèe nyan rupa
Meunan umpama haba lam ca’e
Neuci bôh arti beusama-sama
Nanggroe geutanyoe jinoe rap reulé
Hukôm ka reulé ancô geulaha
Yang peuköng hukôm jinoe ka jahé
Jih pih korupsi h’an ék ta kira
Péng deungön meuh keubah lam café
Bôh neuci piké nyan panè atra
Cukôp jai teumpat Ji simpan rupé
Hèboh bukön lé ban ji paréksa
Ji jaga lé tentra rumoh si jahé
Mangat polisi bèk ji jeut teuka
Tapi ‘oh dudoe polisi meuhasé
Ji paréksa lé deungön seksama
Di dalam brengkas h’an jeut ta piké
Dolar ngön rupé meuh batang pih na
Dua blaih boh rumoh ka ji seuruvei
Neucuba piké wahé syèdara
Siplôh rumoh teuk kheun pak polisé
Kasus korupsi payah paréksa
Tapi ‘oh dudoe alèh cit pakré
Seungap bukön lé hana beurita
Lôn deungö ka damè paréksa tan lé
Meunan ji rawé dalam media
Alèh cit beutôi hana lôn tukré
Geutanyoe akhé ta tukri hana
Ban mahasiswa surak ji demo sabé
Barô si Jahé meukotek hana
Mantöng bèla droe meunoe ji kheun lé
Uang yang di café ada yang punya
Nyo meunan ji peugah neu cuba piké
Entèng bukön lé alasan ji ba
Memang bandum pèng cit na po sabé
H’an peu ta piké jameuen kön kana
Kön cit nyan mantöng masalah korupsé
Ka bandum saré ka sama rata
Ka ji meukuet-kuet rata instansé
Nanggroe pih reulé rakyat sengsara
Nyo untuk jaga h’an pat ta yue lé
Ikôt cit korupsi ureung paréksa
Mentri hukôm pih ka saboh jahé
Koruptor hai akhé didamai saja
Meunan keuh ji kheun neuci teuk piké
Peukeuh jeut ta kheun jahé wahé syèdara
Awak lagèe nyan adak jeut laju beumaté
Bèk ji jak peureulé hukôm negara
Neubri yaa Allah yaa Rabbol Qadé
Bandum yang korupsi nebri beufana
Meunyo awak nyan h’an sadar jih lé
Leubèh göt maté h’an meupat rimba
Neubri yaa Allah keu kamoe pemimpin adé
Beugeutém piké keu rakyat dum na
Neubri seulamat pemimpin adé
‘Oh uroe akhé teuma neubri syeuruga
Meunan geutanyoe meudo’a sabé
Kadang ‘oh akhé tanyoe sejahtra
Dum hasé bumoe laôt deungön glé
Beumandum beujilé lam kas negara
Bèk bak rakyat mantöng pajak ji rugé
Meunyo teulat tabré tanyoe ji deunda
Lapan ploh dua % apbn bak pajak ji rugé
Hasé bumoe ho jilé aléh salah keulola
Nanggroe geutanyoe dumpeu na hasé
Nyo kön ji korupsi rakyat teuntèe sejahtra
Sidéh nanggroe gop ta cuba teuk piké
Bumoe tan jai hasé lagèe konoha
Tapi rakyat jih sejahtera kön lé
Meu ubat pih pré h’an peu meudawa
So ai lapangan kerja pih h’an peu piké
Kadang bak droe h’an sép lé ureueng kerja
Meunan keuh akibat pemimpin adé
Rakyat jih saré udép seujahtra
Semoga bak saboh saat tanyoe Allah bré
Pemimpin adé ngön bijaksana
Pemimpin jinoe geubri beuteubuka haté
Buet-buet yang jahé bèk lé keureuja
Bèk lé korupsi keu nanggroe jipiké
Nyan barô meuhasé rakyat seujahtra
Sidéh lam rimba ureung cok awé
Sinoe binèh glé geupula lada
Meunyo cit salah haba lôn rawé
Meu’ah beuneubré keu lôn syèdara*
Sp. Mesra, 27 Juli 2026.
