- Oleh Tgk. Samuti Sp. Mesra
KABARDAILY.COM | BUDAYA
Assalamu’alaikum warahmatullah
Keu rakan sahbah saleuem lôn peutrôk
Meusidroe rakan hana lôn keubah
Hana hai sahbah bèda meubé ôk
Keu kawôm Mak ngön kawôm Ayah
Saleuem sipatah pih ulôn peutrôk
Keu tuha ngön muda pih saboh beureukah
Bak lôn hai sahbah saleuem ulôn jôk
Na saboh haba ulôn neuk kisah
Balasan Allah jinoe cit ka trôk
Meunyo baroekön bandum ji bantah
Watèe gop peugah ji kheun bèk sibôk
Meumacam cara haba ji peugah
Meusoe yang bantah laju ji peubrôk
Hana ji tupeu droe jih yang salah
Meunan keuh sahbah akai si budôk
Jinoe masalah sadap pih ka viral leumpah
Kapolri sahbah yang pimpin buet brôk
Yang le ji sadap hp pemerintah
Nyo meunan ulah kön cukôp budôk
Ban ka lagèe nyoe meubarô sôsah
Ka ji beureukah jaroe ka ji rôk
Ka lam tahanan sinan ji keubah
Bajèe orèn sahbah jinoe ji peusôk
Ta harap keu pageue keubeue bèk leupah
Tapi hai sahbah pageue pih budôk
Yang pajôh tanaman pageue meutuah
Han pat ta peugah jameuen nyoe ka trôk
Meunan keuh tamsé haba lôn kisah
Nak meuho arah haba lôn peutrôk
Ta yue beurantah sabu nibak peutugaih
Awak nyan pih sahbah yang ikôt mabôk
Waki presiden pih jinoe ka meumasalah
Ka payah keubah tugaih wahé rakan euk
Karna watèe ji ék kön dilèe ka salah
Peraturan ji ubah lé paman budôk
Nak cukôp umu aturan ji ubah
Keumuen nak leupah tujuan beutrôk
Nyo keu suai pèng hana masalah
Ka awai ji keubah cukôp jai tumpôk
Jai that tumpôk pèng yah jih yang keubah
Rata jeut daerah upeti pih trôk
Hasé tambang meuh ngön tambang timah
H’an peu ta peugah dari nyan pih trôk
Mulai jinoe Allah peuleumah
Ngön wap ijazah ka leumah buet brôk
Keputusan MA hana pat bantah
Beuthat ji peugah MA ji kheun brôk
Pakön jeut keu wapres nyo tan ijazah
Ci piké sahbah kön ulôn peubrôk
Rakyat jeulata cukôp that sôsah
Beuthat ijazah ka dum ho ji jôk
Tapi keureuja meusapat h’an paih
Lowongan ji peuhah cit cuma béôk
Jeut keuh pengangguran meulimpah ruah
H’an peu ta peugah wahé adoe euk
Aneuk burujuek di công bak panah
Aneuk siwah jéh di công bak jôk
Peumeu’ah ulôn meunyo cit salah
Hana niet sahbah gop ulôn peubrôk
Neukalön keudroe beutôi peu salah
Meunyo cit salah meu’ah beurayek
Tapi nyo beutôi lagèe lôn peugah
Nyan keuh balasan Allah jinoe cit ka trôk *
Sp. Mesra, 13 November 2026.
