- Tgk. Samuti Sp. Mesra
KABARDAILY.COM – BUDAYA
Assalamu’alaikum wahé e waréh
Saleuem sibaréh kirém keu gata
Saleuem seujahtra hana lôn peucéh
Keu bandum waréh tuha ngön muda
Beurangpat mantöng droeneuh hai waréh
Sinoe ngön sidéh bandum lôn sapa
Na bacut haba lôn keuneuk rintéh
Pemimpin ta piléh lôn neuk ceurita
Mangat bèk salah geutanyoe piléh
Yôh goh ta piléh ingat syèdara
Seubab nyo salah geutanyoe piléh
Limöng thôn keudéh tanyoe sengsara
Ureueng yang caröng geutanyoe piléh
Meunan cit aréh ngön bijaksana
Bèk beurangkasoe meuka ta piléh
Wajéb ta piléh yang meuagama
Geutanyoe Islam piké beuabéh
Nyo salah ta piléh tanyoe meudesya
Nyo wap ji jôk pèng geutanyoe piléh
Nyan pih hai waréh cukôp meudesya
Jinoe ka ta rasa udép teuh peudéh
Peu ka salah piléh yôh nyan syèdara
Ci jaweub keudroe bèk lôn yang tuléh
Wahé e waréh cuba peurasa
Nabi geupeusan dari uroe jéh
H’an geubri piléh ureung that hawa
Beuthat ji lakèe sabé beutatém piléh
Ji janji nyoe jéh ‘oh jih kuasa
Meuribée janji meunyo teupiléh
Yang meunan waréh cit ka beasa
Yang le that janji cit h’an jeut ta patéh
‘OH lheuh ta piléh meusapeu hana
Ureung lagèe nyan sagai bèk piléh
Nyo cit ta piléh tanyoe yang theun jra
Neu rasa keudroe nyo h’an neupatéh
Kön cit hai waréh lôn peuna-peuna
Ureung amanah nabi yue piléh
Bèk tanyoe piléh yang meuélanya
Rekam jejak kalön beuabéh
Dari uroe jéh bak saboh masa
Kadang korupsi buet jih uroe jéh
Nyo cit ta piléh nyan pih brat desya
Meunyo cit talô ureung ta piléh
Wahé e waréh bèk putôh asa
Ka ta useuha deungön haté gléh
Beulaja abéh pih kadang hana ta kira
Meunyo cit lheuh nyan hana teupiléh
Bak Allah sidéh tanyoe meusalah hana
Burujuek balè di công bak manggéh
Di công keureuléh aneuk cém pala
Meumada ‘ohnoe haba lôn rintéh
Meu’ah hai waréh nyo salah rika*
Sp. Mesra, 14 September 2026.
