- Oleh : Tgk. Samuti Sp. Mesra
KSBARDAILY.COM – BUDAYA
Assalamu’alaikum rakan lôn tuan
Saleuem keu taulan lôn kirém rata
Saleuem horeumat keu bandum rakan
Pat mantöng tinggai hana lôn beda
Yang teungöh si lampôh atawa di blang
Sambôt hai rakan saleuem seujahtra
Gantoe meureumpök tanyoe poh rantam
Jép kupi sikhan ngön sikrak bada
Na saboh haba lôn keuneuk karang
Nanggroe rap rincam lôn neuk ceurita
Rata jeut sagoe kasyo kön wayang
Penjilat rakan ban siseulingka
Awak meulieh jinoe cukôp jai
Udép awak nyan toe penguasa
Yang peunténg that pemimpin seunang
Dak reulöh iman hana ji kira
Kisah lawét nyoe wahé e rakan
Buku ji karang soai agama
Islam ala Prabowo jinoe ka viral
Ureueng yang karang meuphôm agama
Ketua MUI yang sidroe rakan
Baznas ‘oh lheuh nyan akai ka sama
Alèh pat ji cok akai lagèe nyan
Buku ji karang pujoe penguasa
Mentri agama pih ikôt di sinan
Soe lom keu panutan tanyoe syèdara
Alèh peu tujuan karang buku nyan
Sang cit untuk pujian keu penguasa
Memang jinoe ka akhé zaman
Dum keujahilan ateuh rueng donya
Islam nusantara dilèe ka lheuh saboh jan
Islam ala Prabowo rakan jinoe pih kana
Cit cukôp hireun teuh watèe ta bayang
Peukeuh jeut keu teladan ureung ta puja
Peukeuh jih malém ta’at keu Tuhan
Padahai jih nyan jeulaih pih hana
Conto yôh jameuen ta ci bayangkan
Nibak masa nyan jahé lagèina
Watèe nyan Fir’un ngaku droe tuhan
Tapi göt that geulawan lé nabi Musa
Padahai Musa nibak watèe nyan
Cit tinggai sajan Fir’un durjana
H’an cit menjilat Musa bak Fir’un nyan
Pakön hai rakan jinoe ka bèda
Kadang pih jinoe peureulèe jabatan
Adak rusak iman hana ji kira
Nibak rakyat nyoe peugah droe kiyai
Padahai ngön binatang pih h’an ta tuka
Sakét that haté ta deungö beurita nyan
Peu lom ka viral sampoe u luwa
Keu ulama nyan ka ji kheun macam
Nyan pih ka viral dalam media
Ho taba muka nyo ka lagèe nyan
Beuthat pih kyai tan lé hareuga
Meubarô teulah meunyo ka viral
Ingat pak kyai yôh goh keureuja
Nyo buet ka leupah pueh that ta ulang
Sang payah mita jalan ho laén donya
Bak piké mangat watèe ta bayang
Padahai wab buet nyan tanyoe ceulaka
Aneuk leuk kutru di công bak mamplam
Aneuk musang di công bak jeumpa
Meumada ‘ohnoe haba lôn karang
Meuah hai rakan meunyo tan beuna*
Sp. Mesra, 10 September 2026
